Nøkur lond í Eysturevropa sluppu nokkso snikkaleys undan varandi skaða av kommunistiskum stýrislag undir Kalda krígnum, ið varaði 45 ár. Tey lógu øll vestaliga og kunnu tí takka sínu sterku kristnu mentan áðrenn 19. øld.

Men Ukraina er so eystaliga, at tað telist enn millum heimsins mest korruptu lond. Tað vísir ein kanning, ið óhefti kanningarstovnurin Transparency Inter-national (Altjóða Gjøgnumskygni) hevur gjørt. Hann hevur høvuðsæti í Berlin.

Hvørt ár gevur stovnurin frágreiðing út, ið fevnir flestu heimsins lond. Norðurlond klára seg oftast best sum óspilt lond. Mest verður farið eftir, um politikarar og embætismenn eru til fals og atkvøða fyri pening. Vina- og kenn-ingaolitikkur, nepotisma, er eisini millum tær fortreytir, ið verða vigaðar.

Men Ukraina liggur altso næst niðast eftir Rusland, ið er botnskravari undir Putin-stjórnini og russisku oligarkunum, ið eru partur av politisku mafiuni.

Onnur lond, ið liggja ájavnt við Ukraina og Rusland, eru hundabøli sum Gambia, Iran og Myanmar. So vit evropear kunnu bert harmast, at lond í Eysturevropa eru so mutrað og kriminaliserað, at politikkur er skitið arbeiði.

Mong miðlafólk royna av avdúka korruptión, men bøta við lívinum. Tað er torført, har ráðandi politikarar traðka pressufrælsi undir fót. Mong tíðindafólk, ið eru ov bersøgin alment í tí, tey skriva og siga, verða tískil fyribeind.

Tað gav at býta í fjør, tá ein kend tíðindakvinna og fyrr býráðsslimur, Kateryna Handzyuk, doyði eftir at politiskir skutilsveinar oystu sýruløg á hana í býnum Kherson. Hon varð so illa etsað um triðing av kroppinum, at hon doyði eftir 11 húðflytingar. Drápið av kvinnuni hevur vakt stóra vreiði um alt Ukraina.

5 fólk eru sett í varðhald, illtonkt fyri tilburðin. Men korruptiónin í Ukraina fevnir ikki bert løgregluna, men ivaleyst eisini heilsuverkið, so hvør er tryggur?

Hví, spyr onkur, eru fyrr kommunistisk lond so illa fongd av korruptión, eisini fleiri ár eftir, at kommunisman fall? Ung fólk billa sær inn við sama lag, at javnrættarskipan er hægsta moralska støðið, eitt samfelag kann náa.

Veruleikin er hin júst øvugti. Í londum, har talu-, skrivi-, trúar-, skipanar- og vinnufrælsi blivu bannað, har ognarrættur og kristni vórðu traðkað undir fót, doyði allur moralur. Har kristin lívsvirði eru fyrbeind, er eingin vón fyri fólkið.