Viðhvørt bera vit menniskju okkum at, sum stava vit beint niður frá apunum. Aðrar tíðir tykist enntá, sum tær stava niður frá okkum, ikki minst tá tær klára líka væl sum listilærdir búrhundar at sleppa til rýmingar úr fongsli.

Associated Press visti um vikuskiftið at siga, at á øðrum sinni var ein apa av sjimpansu slag sloppin úr apubúrinum í Djóragarðinum í Belfast.

Tað kláraði hon, tí eitt illveður hevði rivið trøini handan rimarnar í búrinum, so ein sjimpansa hevði klárað at pjøssa ein stiga saman við greinum, ið hon setti móti rimaverkinum innan og klatraði uppum og gekk sær ein túr í garðinum.

AP tosaði við eina konu, ið var komin í djóragarðin at vísa børnunum apur. Tá hon møtti hesi leysu sjimpansuni til gongu ímóti sær, gjørdist hon hjartkipt. Hon væntaði, at apan leyp á seg og kanska rann avstað við einum barni.

Konan sissaði seg tó so frægt, og børnini hildu einki undarligt vera í at heilsu upp á eina apu á opnum veg í djóragarðinum, at eingin teirra leyp framav og loypti hvøkk á sjimpansuna, so hon leyp á tey at verja seg.

Gorillur, orangutangur og sjimpansur verður mettar klókastu skapningar á jørð næst eftir menniskju. (Tær líkjast summum av okkum so nógv, at henda raðfesting av skapningum í klókskapi ljóðar sannlík um ikki øvugt).

National Geographic heldur uppá, at hesir “primatar” hava 98,5% av DNA-num felags við menniskju. Apur samskifta, gera og brúka ymisk amboð.

So kunnu vit spyrja, um verandi gongd førir til, at fólk og apur fara at giftast? Úrslit av slíkari blanding kundi ein freistast til at hugsa er heilt rímilig, tá homo sapiens ber seg býttast at. Tá er minni munur á sløgunum.

Ella kanska verður loyvt at skifta kyn frá fólki til apu? Tað skuldi ikki verið óhugsandi, tá tað sigst, at 56 ymisk kyn av fólki eru staðfest.

Nógv dømi eru um, at fólk bera seg at, sum teir føla seg sum apur í mannakroppi. Tað mátti verið ein hóskandi uppgáva at gera nakað við.

Ná, men so langt hugleiðir AP ikki eftir hesa hending við apum í Belfast. Tær fóru sjálvar inn í búrið aftur, so tær hava tað helst gott har.