Nýggja skipið hjá Strandfaraskipum Landsins, Spógvin (fyrr Alpha Pilot), kom í gjár inn á Havnina. Spógvin, sum skal røkja Hest- og Koltursleiðina, er pussaður innan og uttan, og eisini er nýggj bátabrúgv gjørd. Enn manglar okkurt smávegis í til báturin verður klárur til siglingina, og roknað verður við, at hann verður klárur at sigla í komandi viku.

Strandferðslan keypti Spógvan fyri nøkrum vikum síðani, og eftir ætlan skal hann sigla á Hest- og Koltursleiðini burturav.

Kringvarpið visti at siga í gjár, at Samferðslumálaráðið trýsti Strandferðsluna til at keypa bátin, hóast leiðslan á Strandferðsluni ikki heldur, at báturin er serliga væl egnaður til siglingina.