Havstovan fer undir at kanna fiskayngul
Talan er um eina nýggja verkætlan, sum Granskingarráðið fíggjar.
Ein nýggj verkætlan um fiskayngul á Landgrunninum fer í gongd á Havstovuni í næstum. Tað sigur Havstovan á síni heimasíðu í dag.
Endamálið er at kanna livilíkindini hjá toska-, hýsu-, hvítingsbróðri- og nebbasildayngli frá apríl, tá larvurnar júst eru klaktar til endan á juni, beint áðrenn toskur og hýsa taka botn.
Ein treyt fyri góðari tilgongd til fiskastovnarnar er, at nógv av ynglinum yvirlivir. Havstovan hevur síðani 1983 gjørt yngulkanningar í seinnu helvt av juni, og hesar kanningar vísa stórar broytingar millum árini bæði í stødd og nøgd.
Føðin er avgerandi
“Bæði toskur og hýsa gýta inni á Landgrunninum um várið, og bæði sløgini gýta fleiri ferðir í einar 2-3 mánaðar. Toskur gýtir eini 500 túsund – 5 mió. egg og hýsan 100 túsund til 1 mió. egg, alt eftir støddini á kvennfiskinum,” sigur Havstovan.
Eggini flotna eftir gýting, og spjaðast við sjóvarfalsstreyminum um Landgrunnin. Klekingin fer fram uml. 2 vikur eftir gýting. Fyrstu 3 mánaðirnar livir ynglið uppi sjónum á innara Landgrunninum, har tað einamest etur djóraæti.
Nýliga er staðfest, at broytingarnar frá ári til ár koma av, at yngulin veksur betri summi ár enn onnur, umframt at tað summi ár doyr lutfalsliga nógv burturav.
Havstovan sigur, at kanningar av føðini hjá toskayngli benda á, at tað er føðimangul, sum elvir til broytingarnar. Enn er tó ógreitt, júst hvør føði hevur størstan týdning fyri yngli og tískil eisini hvar fløskuhálsurin er.
Leita eftir svarinum
Fyri at fáa greiðu á hesum, fer Havstovan við Magnusi Heinasyni at savna inn yngul á Landgrunninum fleiri ferðir frá apríl til juni í ár. Ætlanin er at kanna tal, longd, aldur og magainnihald hjá ynglinum umframt at gera kanningar av føðiviðurskiftunum og umhvørvinum.
“Á hendan hátt ber til at lýsa, nær ein møguligur fløskuhálsur uppstendur og hvør orsøkin er,” sigur Havstovan.
Granskingarráðið fíggjar verkætlanina.
Mest lisið í farnu viku
Samband
Heygsvegur 8
490 Strendur