Landsstýriskvinnan í almannamálum, Eyðgunn Samuelsen, er úti við grein í dag, har hon verjir hækkaðu forsorgarhjálpina.

Eg havi allatíðina gjørt greitt, at sjálvandi skulu vit gera alt, vit kunnu, soleiðis at børnini ikki detta niðurímillum.

Trupulleikin er bara, at við uppskotinum dettur arbeiðsmaðurin og – kvinnan niðurímillum. Hetta er tað, sum Javnaðarflokkurin gloymir. Eisini Eyðgunn Samuelsen, landsstýriskvinna í almannamálum.

Nú kann ein stakur uppihaldari við tveimum børnum vera heima á forsorg fyri 20.414 kr. um mánaðin, NETTO, tvs. aftaná skatt, í mun til at arbeiða 30-40 tímar um vikuna. Munurin er 700 kr. eyka um mánaðin. Ella 4 kr. eyka um tíman.

Tað er hetta, vit finnast at. Arbeiðarin verður gloymdur og dettur niðurímillum.

Vit mugu ikki gloyma, hvør tað er, sum rindar. Tað er arbeiðarin, flakakvinnan, krambakallurin, ið knossar 30-40 tímar um vikuna. Tað eru tey, sum halda samfelagnum uppi. Tí er tað óðamannaverk at gera eina skipan, har tað loysir seg betur at vera á forsorg, enn at fara út á arbeiðsmarknaðin.

Tað tykist tíverri, sum Eyðgunn Samuelsen, landsstýriskvinna í almannamálum, og Javnaðarflokkurin hava gloymt arbeiðaran í excelarkinum. Sjálvandi skulu vit hjálpa teimum, sum hava brúk fyri hjálp, serliga børnunum, og tað havi eg strika undir í allari viðgerðini,.

Tað skal altíð loysa seg at arbeiða. Tað ger tað ikki nú.