5. flokkur í Sands skúla er ársins Vitanarfróðu 2019
Fríggjadagin var kunngjørt, at 5. flokkur í Sands skúla fekk heiðurin sum ársins Vitanarfróðu 2018/19. Tað fingu tey fyri frágreiðingina: “Hvørja farvu hevur eitt spegl?”.
Ein dómsnevnd við 4 umboðum hevði lisið og mett um frágreiðingarnar. Hesi eru Fríða Poulsen Eysturoy, lærari, Firouz Gaini, granskari, Karina Toftegaard, ritstjóri, og Annika Sølvará vegna Granskingarráðið.
- Nevndin helt, at hesin flokkurin hevði valt eitt passaliga avmarkað evni. Hugskotið var gott, arbeiðið sá út til at vera samanhangandi og royndirnar vóru kreativar og væl funnar uppá, segði Annika Sølvará
Vinnandi flokkurin fær umframt heiðurin 5.000 kr. til flokkin og ein túr saman við granskarum, sum vit fara at leggja til rættis í felag.
Flestu av teimum umleið 100 næmingunum, sum luttóku í kappingini, vóru til staðar saman við lærarum sínum. 11 frágreiðingar komu inn. Tað vóru næmingar frá Eysturskúlanum, Skúlanum á Argjahamri og Sands Skúla.
Hvør bólkur, sum luttøk, fekk skreytblað við luttøkuváttan. Harafturat fekk hvør luttakari eina bókagávu, sum tey kunnu brúka til íblásturs at arbeiða víðari við arbeiðsháttinum hjá Vitanarfróðu. Gávan var bókin "Plastruskið í sjónum", sum Bókadeild Føroya Lærarafelags júst hevur givið út.
Mest lisið í farnu viku
Samband
Heygsvegur 8
490 Strendur