Týska blaðið Der Spiegel vil vera við, at týski kavbáturin U36 rendi á land í Noreg týsdagin. Kavbáturin kom til Noregs í januar, fyri at verða við í eini venjing.

Blaðið skrivar, at ein kavari hevur verið niðri og kannað skaðarnar, og at sjónbandaupptøkur, sum hann hevur gjørt, verða í løtuni kannaðar.

Bjargingarmiðstøðin HRS Sør-Norge og norska sjóverjan siga við blaðið VG, at tey kenna einki til hendingina.

Der Spiegel skrivar at tríggir av seks týskum kavbátum eru í løtuni virknir.

Hetta er ikki fyrstu ferð, at ein týskur kavbátur fær skaða í Noreg. Kavbáturin U35 fekk stóran skaða í Noreg í 2017.