Norska alivinnan stríðist í løtuni við algur, sum hava gjørt av við nógvan alilaks. Netsíðan “ilaks” skrivar, at ein meting hjá “Fiskeridirektoratet” í gjár segði, at í Nordland og Troms vóru meira enn 10.000 tons av laksi farin fyri skeytið. Hetta er ikki fullvaksin laksur, og hildið verður, at tøkan av laksi fer at minka við í minsta lagi 30.000 tonsum orsaka av algunum.

Alguvøksturin ta seinastu vikuna er tann ógvusligasti síðani 1991, og óttast verður fyri, at algurnar fara at reka vesturyvir í dag, til trý aliøki, har 11.000 tonsum av alilaksi eru.