Tekniska fyrisitingin hjá Tórshavnar kommunu fer nú at gera tekniskar og fíggjarligar kanningar av einum møguligum parkeringstunli undir miðbýnum í Havn. Tað varð samtykt á býráðsfundi í gjárkvøldið. Tunnilin fer, sambært einum skitsuuppskoti, at verða umleið ein kilometur langur og hava pláss fyri umleið 700 parkeringsbásum.

Stórur tørvur er á parkeringsplássum, og fleiri loysnir hava verið umrøddar, sigur kommunan, sum fer at seta ein innanhýsis arbeiðsbólk til at gera eina yvirskipaða tørvslýsing av møguligum parkeringstunli, leiðingum og annað í sambandi við tunnilin, og ein ráðgevi verður eisini settur til at gera eitt skitsuprojekt, kostnaðarmeting og annað.

Mett verður, at arbeiðið at gera tørvslýsing, skitsuprojekt og kostnaðarmeting fer at kosta um hálva millión. Málið var fyri í fíggjarnevndini í farnu viku, har tað varð einmælt samtykt, og í gjárkvøldið varð tað eisini samtykt á býráðsfundi.