10 sjúkrarøktarfrøðingar fingið prógv í serútbúgving innan krabbameinssjúkrarøkt
Í gjár fingu 10 sjúkrarøktarfrøðingar prógv í serútbúgving innan krabbameinssjúkrarøkt. Tær starvast á B6, G3, G4 og á Suðuroyar Sjúkrarhúsi.
Hetta er ein sera stórur dagur hjá hesum sjúkrarøktarfrøðingum og samstundis eisini stórur dagur fyri deildirnar, har tær arbeiða. Men ikki minst kemur hetta at gagna krabbameinssjúklingum í Føroyum, umframt fleiri aðrar sjúklingabólkar, sum fáa gagn av teimum førleikum, sum tær hava vunnið sær. Tað skrivar Landssjúkrahúsið á facebook.
Serútbúgvingin í krabbameinssjúkrarøkt er ein útbúgving á 60 ECTS stig og tekur 1½ ár. Ástøðisparturin av útbúgvingini er tikin sum fjarlestur og er starvsvenjingin í stóran mun tikin á egnum starvsstaði.
Hetta er aðru ferð, at prógv verður handað í hesi útbúgving. Fyri tveimum árum síðani fingu fimm sjúkrarøktarfrøðingar, ávikavist frá B6, G3 og Klaksvíkar Sjúkrahúsi prógv sum serútbúnir krabbameinssjúkrarøktarfrøðingar.
Fyri fýra árum síðani gjørdi Landssjúkrahúsið slóðbrótandi avtalu við Metropol um, at gera hesa útbúgving sum fjarlestur og hetta hevur gjørt tað møguligt hjá fleiri sjúkrarøktarfrøðingum at útbúgva seg, skrivar Landssjúkrahúsið.
Mest lisið í farnu viku
Samband
Heygsvegur 8
490 Strendur