Eftir 18 ár sum samkomuleiðari, hevur hann ynskt at fara í farloyvi inntil august/september næsta ár. Jógvan kemur ikki at sita hendur í favn hetta ári, tí hann er nevniliga settur í eitt spennandi hálvtíðarstarv innan missiónsfelagsskapin Billy Graham Evangelistic Association, sum heimskendi evangelisturin Billy Graham, sáli setti á stovn fyri mongum árum síðani.

FYRI 65 ÁRUM SÍÐANI
Í 2020 verða tað 65 ár síðani Billy Graham hevði síni fyrstu stórmøtir í Onglandi, og tað er hetta, sum sonur hansara, evangelisturin Franklin Graham, ynskir at minnast. Í hesum sambandi hevur felagskapurin, Billy Graham Evangelistic Association, við Franklin Graham á odda, ætlanir at skipa fyri evangeliskum stórmøtum í 10 størri býum í Stóra Bretlandi.

Tiltakið fer av bakkastokki seinast í mai í 2020, tá stórmøti verður í 10 býum í alt, og seinasta møti verður 04. oktober í London, í stóra bygningsverkinum Millennium Dome, sum varð bygt og reist fyri 19 árum síðani í samband við aldarskifti. Hetta verður fyrsta átak av sínum slag í hesum stóra og kenda bygningi.

Tiltakið fer av bakkastokki undir heitinum UK2020 (UNITED KINGDOM 2020).  

Fyrireikingarnar í Bretlandi byrja longu í ár, og tað er í fyrireikingarhøpinum, at Jógvan Zachariassen er boðin at vera ein partur av fyrireikingartoyminum. Ein av býunum, har Franklin Graham kemur at hava stórmøtir, verður Walisiski býurin Cardiff, har Jógvan  kemur at verða sjálvur annar í fyrireikingartilgongdini, sum kemur at taka í umleið eitt ár.

Jógvan er settur í hálva tíð, sum merkir, at hann verður burtur í 14 dagar og verður heima í 14 dagar. Jógvan sigur, at tá hann er heima kemur hann ikki at virka sum samkomuleiðari í Lívdini, men hann kemur tó at tala og undirvísa sum vanligt. Tá hann kemur aftur av farloyvinum fer hann at virka sum áður í samkomuni Lívdin.

Samkoman Lívdin hevur hesa heilsan til Jógvan á heimasíðuni: “Vit gleðast um, at Jógvan hevur fingið eitt so spennandi og mennandi starv komandi árið og fara at heita á samkomuna um at biðja fyri honum og stóra UK2020 tiltakinum.”

Kristiliga Tíðindatænastan
v/poul jóhan djurhuus
gjaranes@gmail.com