Hóast norska fótbóltslandsliðið vann 2-0 á Føroyum á Tórsvølli í gjárkvøldið, so fær liðið av at vita frá fótbóltsserfrøðingum og á sosialu miðlunum í heimlandinum.

Ein av teimum, sum gevur norska liðnum harðar atfinningar, er fyrrverandi venjarin  Egil «Drillo» Olsen.

“Her er sera nógv at finnast at. Tað, sum skuffar meg, er styrkin í verjupartinum. Vit vóru heppin, at tað ikki bleiv 1 - 1. Hetta var langt undir virðinum á liðnum og ein av vánaligastu landsdystunum, vit hava spælt,” segði hann við norska TV 2 eftir dystin.

Venjarin hevur nógv, sum hann má arbeiða við

“Okkurt er galið. Javnvágin á liðnum er ikki røtt, miðvallarduoin virkar ikki, ruddingin í egnum 16-metri er næstan ikki til, og bakkarnir gera nógv býtt. Sum heild: Tað er sera nógv sum Lars Lagerbäck skal fáa gjørt áðrenn teir írestandi seks dystirnir í undankappingini verða spældir í heyst.” Tað skrivar Knut Espen Svegaarden, fótbóltsviðmerkjari hjá blaðnum VG.

Vánaligasta avrikið í ár

Á tíðindafundinum eftir dystin á Tórsvølli mátti venjarin hjá norska liðnum, Lars Lagerbäck, svara nógvum kritiskum spurningum, sum millum annað snúðu seg um manglandi evnini at rudda burtur í 16-metrinum, har Føroyar høvdu fleiri góðar møguleikar.

Lars Lagerbäck viðgekk, at hvat spælinum viðvíkti var talan um vánaligasta avrikið hjá norska liðnum í hesum árinum.

Sigurin í gjárkvøldið var tann fyrsti, sum Noreg hevur vunnið í hesi undankappingini.