Fleiri túsund mótmælisfólk hava í dag avbyrgt teir báðar høvuðsvegirnar í Hongkong, og hava somuleiðis avbyrgt bygningin, har lóggávutingið heldur til. Hetta verður gjørt fyri at mótmæla nýggju útflýggingaravtaluni við Kina, sum lóggávutingið eftir ætlan skal samtykkja. Sambært avtaluni skal tað verða møguligt at senda tey sum eru undir illgruna í revsimálum til rættarsókn í Kina.

Hongkong er partur av Kina, men býurin hevur víðfevnt sjálvstýri, og hevur sína egnu rættarskipan. Nógvir íbúgvar í Hongkong bera ótta fyri, at útflýggingaravtalan fer at verða brúkt til at revsa politiskar fangar.

Sambært fleiri miðlum luttóku meira enn ein millión fólk í mótmælistiltøkum í Hongkong sunnudagin, og mótmælini hava fyribils havt við sær, at ætlaða viðgerðin í lóggávutinginum í dag, er útsett í óásetta tíð, skrivar tíðindastovan AP.

Mannarættindafelagsskapir hava áhaldandi víst sína stúran fyri, at rættarmál í kinesiskum dómstólum fara ikki at vera frí og rættvís, og at mannarættindi fara ikki at verða vird.

Hongkong er fyrrverandi bretskt hjáland, men í 1997 fekk Kina býin aftur, sum ein serskildan umsitingarligan landslut.