Leygardagin verður ein minnisvarði avdúkaður í Svínoy.

Minnisvarðin er reistur yvir tey, sum farin eru av vanlukku bæði á sjógvi og landi, og tað er Edward Fuglø, listamaður, sum hevur gjørt minnisvarðan. Tað skrivar Klaksvíkar kommuna á síni heimasíðu.

Minnisvarðin er skipaður soleiðis, at hann røkkur so langt aftur í tíðina, sum skrivligar keldur greiða frá vanlukkunum. Tí verður farið heilt aftur til 1739, og nýggjasta navnið er frá 1984. Í hesum tíðarskeiði eru 51 menn og ein kvinna farin av vanlukku.

Í tíðarskeiðnum 1861 - 1913 gingu seks Svínoyarbátar burtur við tilsamans 24 monnum.

“Skipað verður fyri góðum sambandi hendan dagin, tí fyriskipararnir vænta hópin av fólki, og eisini er skrá við guðstænastu, áðrenn farið verður út til minnisvarðan,” skrivar Klaksvíkar kommuna.