23 lesandi hava søkt inn á nýggju útbúgvingina í listaligum arbeiði, sum Fróðskaparsetur Føroya bjóðar út. Umsóknarfreist til útbúgvingina var leygardagin 1. juni á midnátt.

Av teimum 23 innkomnu umsóknunum eru 15 til Ritlist og 8 til Tónlist, sigur Fróðskaparsetrið.

Sambært ætlanini og lýsingini av útbúgvingini verður pláss fyri umleið 7 lesandi á hvørjari leið, men talið kann hækka ella lækka eitt sindur eftir talinum og dygdini á umsóknunum.

Umframt miðnámsskúlaprógv skuldu umsøkjararnir senda inn dømi um egið avrik og ein listaligan profil, sum í stuttum lýsir umsøkjaran sum listafólk.

Upptøkunevndir fara nú at meta um umsóknirnar, sigur Fróðskaparsetrið. Viðgerðin av umsóknunum verður liðug seinni í hesum mánaðinum, og umsøkjararnir fáa fyrst í juli mánaði at vita, um tey eru tikin upp.

Nýggja útbúgvingin er ein tvey ára diplomútbúgving.