BankNordik bjóðar nýhugsandi fyritøkum nýggjan fíggingarmøguleika
ES-skráin “InnovFin” veðheldur fyri 50% av lánsupphæddini
Nú verður lættari hjá nýhugsandi fyritøkum at fáa fígging til nýskapandi verkætlanir. BankNordik boðar í dag frá, at bankin, sum tann fyrsti peningastovnurin í Føroyum og Grønlandi, hevur gjørt avtalu við Europeiska Íløgugrunnin, EIF, ið gevur bankanum møguleika at veita nýhugsandi fyritøkum lán við lagaligum treytum.
“Avtalan millum BankNordik og EIF loyvir BankNordik at veita vinnukundum nýggj lán við kappingarførum treytum og veðhaldi úr ES-skránni “InnovFin”, ið hevur til endamáls at bøta um fíggingarmøguleikarnar hjá smærri og miðalstórum fyritøkum í Evropa,” sigur bankin.
Við avtaluni ber til hjá BankNordik at veita vinnukundum nýggj lán fyri samanlangt 300 mió. krónur, meðan InnovFin veðheldur fyri 50% av lánsupphæddini, ið verður latin.
BankNordik skal viðgera allar lánsumsóknir til tess at tryggja, at lántakarar lúka ásettu treytirnar í InnovFin.
Fíggja verkætlanir sum geva framhaldandi vøkstur
InnovFin stuðlar nýskapandi verkætlanum, annaðhvørt talan er um fígging til íverksetarafyritøkur ella ítøkiligar verkætlanir, har ein fyritøka hevur í hyggju at seta í verk nýskapandi ella burðardyggar framleiðsluhættir, mannagongdir, vørur ella tænastur.
“BankNordik fer at veita fígging til verkætlanir, sum verða mettar at geva eitt íkast til framhaldandi vøksturin í fyritøkuni,” sigur bankin.
Ein vanlig kredittmeting av fyritøkuni verður, sum altíð, ein partur av viðgerðini av lánunum við InnovFin-veðhaldi.
InnovFin er partur av evropiska granskingarsamstarvinum Horizon 2020, ið Føroyar rinda eitt árligt luttøkugjald til, og sum gevur Føroyum atgongd til stuðul úr felags ES-játtanini.
Mest lisið í farnu viku
Samband
Heygsvegur 8
490 Strendur