Suðuroyartunnilin fer at kosta meira enn 3 mia. krónur
Ein arbeiðsbólkur sum í dag hevur handað landsstýrismanninum við samferðslumálum eitt álit um Suðuroyartunnilin sigur, at tað fer at bera til at rinda tunnilin aftur eftir 18 árum.
Ein undirsjóvartunnil millum Sandoynna og Suðuroynna fer at kota umleið 3 mia. krónur í dagsins peningi, umframt nakrar ókendar útreiðslur. Tað stendur í álitinum, sum ein arbeiðsbólkur í dag handaði Heðini Mortensen, landsstýrismanni við samferðslumálum.
Arbeiðsbólkurin heldur, at tað er møguligt at gera ein tunnil av Skarvanesi til Sandvíkar. Ein slíkur tunnil verður umleið 22,5 km. langur.
Av tí at Suðuroyartunnilin verður so langur kann roknast við at fleiri trygdartiltøk skulu gerast í honum enn í hinum undirsjóvartunlinum, og eisini verður neyðugt at gera nýggjan tunnil millum Hvalba og Sandvík. Hesin tunnilin er mettur at verða 2,5 km. langur og kosta umleið 200 mió. krónur.
Kann rindast aftur eftir 18 árum
Um møguleikarnar at rinda kostnaðin av tunlinum sigur arbeiðsbólkurin, at við eini ferðslu við 1.600 bilum um samdøgrið í 2030, sum veksur 2,5% árliga, og við somu prísum, sum nú eru galdandi við Smyrli, og við einum árligum almennum rakstrarstuðli á 75 mió. krónur, sum svarar til játtanina á fíggjarlógini til Smyril til rakstur og klassing, so fer at bera til at rinda tunnilin aftur eftir 18 árum.
Tá verður roknað við einum rakstrarkostnaði á 33 mió. krónur um árið, eini lánsrentu á 2,73%, sum er tað sama sum rentan hjá p/f Eystur- og Sandoyartunlum, og partapeningurin, sum landið skal eiga, er settur til 800 mió. krónur, sum svarar til tað sum tað kostar at byggja ein nýggjan Smyril.
Heðin Mortensen fer nú at nærlesa álitið og gera av, hvat víðari skal henda við málinum um ein Suðuroytunnil.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur