Michel Platini handtikin
Orsøkin til handtøkuna er illgruni um mutur í sambandi við, at HM-endaspælið í fótbólti verður í Qatar í 2022.
Fyrrverandi forsetin í europeiska fótbóltssambandinum UEFA, Michel Platini, er í dag handtikin. Tað skriva fleiri altjóða miðlar.
Handtøkan er liður í kanningini av Platini, sum er undir illgruna fyri mutur í sambandi við, at oljulandið Qatar verður vertur fyri HM-endaspælinum í fótbólti í 2022. Avgerðin um hetta varð tikin í 2010.
63 ára gamli Platini hevur ikki havt nakran leiklut í sambandi við fótbólt síðani 2015, tá FIFA vísti honum burtur frá øllum fótbóltsvirksemi í 8 ár. Hetta bleiv tó seinni broytt til 4 ár. Hetta varð gjørt sum avleiðing av, at hann hevði tikið ímóti tí sum svarar til 13,5 mió. krónur í okkara peningi frá FIFA.
Michel Platini var í síni tíð sum fótbóltspælari tríggjar ferðir kosin heimsins besti fótbóltsspæalari.
Hildið verður ikki, at handtøkan í dag fær nakrar avleiðngar fyri endaspælið í Qatar.
Mest lisið í farnu viku
Samband
Heygsvegur 8
490 Strendur