BankNordik hevur latið 16 ára gomlu Angelu Djurhuus úr Kollafirði og Fenju Poulsen úr Havn eitt útbúgvingarlegat í sambandi við nýggja norðuratlantiska studentaflokkin, ið byrjar eftir summarfrítíðina. Báðar hava fingið 75.000 kr. í útbúgvingarlegati hvør.

Nýggja útbúgvingin gevur ungum í Norðuratlantshavi møguleika at nema sær eina heilt serliga og fjølbroytta studentsútbúgving, samstundis sum tey lesandi fáa høvi at búgva í fleiri londum og uppliva ymiskar mentanir.

Skúlagongdin tey trý útbúgvingarárini verður nevniliga býtt millum Danmark, Føroyar, Ísland og Grønland.

Av tí at tey lesandi fara at hava útreiðslur til vistarhald og ferðing millum tey ýra londini, letur BankNordik til samans 150.000 kr. í útbúgvingarlegati, ið skal lætta um fíggjarligu byrðuna hjá teimum ungu. Fenja Poulsen og Angela Djurhuus, sum báðar søktu legatið til útbúgvingina, eru fegnar um fíggjar- liga stuðulin frá BankNordik í lestrartíðini, og tær gleða seg til skúlabyrjan.

“Tað er sera spennandi at sleppa uttanlands at lesa og samstundis kunna ferðast og uppliva eina rúgvu”, sigur Fenja. Eisini Angela væntar sær eina spennandi skúlagongd í norðuratlantiska studentaflokkinum. “Eg havi valt júst hesa útbúgving, tí hon gevur mær møguleika at royna nakað áhugavert og øðrvísi, samstundis sum eg vóni at fáa vinfólk úr ymiskum londum,” sigur Angela, sambært tíðindaskrivið frá BankNordik

Eftir summarfrítíðina fara Fenja og Angela saman við hinum 30 næmingunum í norðuratlantiska studentaflokkinum til Danmarkar, har tær skulu ganga í 1.g. Í 2.g gongur leiðin til Kambsdals í Føroyum og harnæst til Íslands, og síðani skulu tær skulu ganga í 3.g í Grønlandi.

Hetta er fyrstu ferð, at norðuratlantiski studentaflokkurin verður royndur. Til ber at lesa meira um útbúgvingina á www.nordatlantisk.dk.