Forkvinnan í Sosialdemokratiska flokkinum í Danmark, Mette Frederiksen, verður nú forsætismálaráðharri. Tað blivu flokkarnir, sum seinastu vikurnar hava samráðst um nýggja stjórn, samdir um seint í gjárkvøldið. 

Flokkarnir sum stuðla stjórnini eru Sosialdemokratarnir, SF, Eindarlistin og Radikali Vinstri. Men allir flokkarnir verða ikki partur av stjórnini, tí talan verður um eina reina Sosialdemokratiska stjórn, har hinir flokkarnir bara verða stuðulsflokkar. 

Einki samgonguskjal

Eitt serligt við nýggju stjórnini er, at hon hevur einki samgonguskjal at arbeiða eftir, men avtalurnar millum flokkarnar eru skrivaðar niður í eitt 18 síður langt skjal, sum flokkarnar kalla eina “felags fatan”.

Á einum tíðindafundi í gjárkvøldið segði Mette Frederiksen, at talan er ikki um ein lista, sum greinar politikkin út í æsir.

“Hetta er listin, sum skal reka stjórnina, ið eg skal vísa hennara hátign drotningini í morgin,” segði hon.

Leggja nógva orku í grønar loysnir

Um innihaldið í teimum 18 síðunum av “felags fatan”, segði Mette Frederiksen á tíðindafundinum í gjárkvøldið, at grønu málsetningarnir verða raðfestir munandi hægri enn higartil. 

“Vit fara at gera eina veðurlagsætlan, eina bindandi veðurlagslóg, og minka útlátið av vakstrarhúsgassum við 70 prosentum,” sigur hon. 

Allir flokkarnir hava fingið okkurt við í avtaluna

Forkvinnan í SF, Pia Olsen Dyhr, sigur, at eitt av stórmálunum hjá hennara flokki: Lógarbundna minstakravið av starvsfólkum á dagstovnum, er partur av nýggju avtaluni. 

“Børnini á dagstovnunum fáa ein heilt annan dagligdag eftir hetta,” sigur hon. 

Politiska framsøgukvinnan hjá Eindarlistanum, Pernille Skipper, sigur, at hennara flokkur hevur fingið lyfti um, at fíggjarligi ójavnin í Danmark skal ikki vaksa. 

“Vit hava fingið eitt greitt lyfti um, at berjast skal ímóti ójavnanum. Tá pengar skulu finnast, so skal tað gerast á ein sosialt rættvísan máta,” sigur hon.

Morten Østergaard, formaður í Radikala Vinstra sigur, at semja er gjørd á búskaparliga økinum, sum millum annað hevur við sær, at latið verður upp fyri útlendskari arbeiðsmegi. Eisini er semja um at vraka oynna Lindholm sum fráferðarmiðstøð fyri brotsligar útlendingar, og ein nýggj fráferðarmiðstøð skal skipast fyri børn, ið ikki fáa friðskjól í Danmark. Harafturat skal Danmark aftur taka ímóti eini kvotu av flóttafólkum.

Men eingin loysn er funnin á spurninginum um, hvat skal koma ístaðin fyri Lindholm, og tal er heldur ikki sett á, hvussu nógvum flóttafólkum, Danmark skal taka ímóti. 

Mette Frederiksen sigur, at bert smáar broytingar verða gjørdar í útlendingapolitikkinum

“Á nøkrum økjum - men bara nøkrum - verða nýggir tónar á útlendingaøkinum,” sigur Mette Frederiksen. Hon vísir á broytingarnar sum verða gjørdar, men leggur afturat:

“Tann breiði útlendingapolitikkurin stendur við, eisini við hesi avtaluni. So alt sum snýr seg um at høgga bremsurnar í, familjusameining, brotsmannalið, útvísing av brotsligum útlendingum, og avtalur um ríkisborgararætt og hugburðsbroytingar, stendur við, eisini eftir at hendan avtalan er gjørd. Tað hevur verið týdningarmikið fyri okkum,” sigur Mette Frederiksen.

Mette Frederiksen fer í dag klokkan 13 (føroyska tíð) til drotningina, fyri at kunna hana um nýggju stjórnina.