Sálarlig og kropslig heilsa skulu javnsetast
Sálarsjúka er størsta fólkasjúkan í nýggjari tíð, og tí má økið eisini raðfestast meir. Hagtøl frá Bedre Psykiatri vísa, at tað eru fleiri fólk, ið líða av sálarligum avbjóðingum, enn tað eru fólk sum m.a hava krabbamein, diabetes og hjartasjúkur. Donsk tøl vísa eisini, at talið av fólki sum eru í samband við psykiatriina er hækkað dupult so nógv seinastu árini, sum talið av fólkum við kropsligum sjúkum er, men enn verður sálarsjúka og psykiatriin raðfest munandi minni.
Vit kunnu ikki snakka um heilsu, uttan at vit taka bæði sálarliga og kropsliga við.
At javnseta sálarligar og kropsligar sjúkur hevur stóran týdning fyri at framyvir tryggja góða heilsuviðgerð í Føroyum. Ein byrjan kundið verið at fólk yngri enn 35 fingu rætt til sálarliga hjálp ókeypis. Arbeiðsbólkurin, sum Heilsumálaráðið hevur sett at gera tilmæli um skipan við ókeypis sálarfrøðiligari viðgerð, mælir eisini til hetta. Vónin er tí, at hetta tilmælið verður tikið í álvara og sett í verk. Men málið má vera, at javnseta sálarligar og kropsligar sjúkur fyri allar føroyingar.
Týskvøldið 2. juli kl 19:30 verður sjóneykan sett á sálarheilsu, tá Unga Tjóðveldi bjóðar til tiltak í hølini hjá Tjóðveldi á Gamla Apoteki.
Anna Malan Jógvansdóttir kemur at greiða frá sínum upplivingum á økinum og hvussu man betrar umstøðurnar í Føroyum.
Umboð fyri Sinnisbata kemur at greiða frá teirra arbeiði og hvat skal til fyri at betra um viðurskiftini.
Lagt er upp til gott kjak og góðar samrøður, skriva fyriskiparinir á Facebook.
Mest lisið í farnu viku
Samband
Heygsvegur 8
490 Strendur