Dreingir fáa nú tilboð um ókeypis koppseting ímóti HPV
Koppsetingin vísir seg at hava fleiri fyrimunir fyri heilsuna hjá dreingjum, bæði í mun til ávís sløg av krabbameini og aðrar sjúkur.
Sirið Stenberg, landsstýriskvinna, hevur sent eitt uppskot um kunngerð til hoyringar um ókeypis HPV-koppseting til dreingir. Talan er um eitt tilboð, sum í fyrstu atløgu verður givið dreingjum í aldrinum 12-17 ár.
Málið um HPV-koppseting til dreingir hevur javnan verið á breddanum, síðani tilboðið til gentur varð sett í gildi í 2009. Hetta kemst av, at koppsetingin vísir seg at hava fleiri fyrimunir fyri heilsuna hjá dreingjum, bæði í mun til ávís sløg av krabbameini og aðrar sjúkur.
Løgtingið hevur samtykt at játta pening til at víðka tilboðið í Føroyum, so tað nú eisini kann fevna um dreingir.
Fleiri gentur koppseta seg
Í Føroyum varð farið undir ókeypis koppseting av gentum fyri HPV tann 1. januar 2009. Byrjað varð við gentum, sum vóru fyltar 14 ár, og seinni varð tilboðið víðkað til gentur niður í 12 ár. Eins og í Danmark fall talið av gentum, ið lótu seg koppseta, ógvusliga í nøkur ár, men nú tykist gongdin at verða vend. Hjá gentum er koppsetingin serliga fyri at sleppa undan lívmóðirhálskrabba seinni í lívinum.
Í fjør fingu 409 gentur fyrstu koppsetingina fyri HPV. Hetta er umleið sama tal, sum tey fyrstu árini, tá tilboðið varð tókt. Í 2016 var talið niðri á 96.
Mest lisið í farnu viku
Samband
Heygsvegur 8
490 Strendur