Jákup Vestergaard og Bjørn Kalsø søgdu í somu sending, at teir ikki taka undir við uppboðssølu og tí eru útlitini fyri breiðari semju sera vánalig.

Aksel Jóhannesen, løgmaður, hevur tvær ferðir sagt, her á R7, at hann ynskir breiða semju um fiskivinnunýskipanina. Breiða semju metti hann verða minst 23 atkvøður fyri.

Bill Justinussen upplýsti eisini í síðstu viku, at Miðflokkurin tekur seg úr samráðingunum um nýskipan av fiskivinnuni. Tó segði hann, at teir vóru sinnaðir at luttaka, um teir blíva ein partur av samgonguni. Tá ljóðaði sum at Miðflokkurin partvís tekur undir við uppboðssølu. Men kravið um at sleppa í samgongu verður trupult at eftirlíka, uttan at málið um vígslu av samkyndum verður slept.

Tað sær út til at banin er kritaður av og allir vita hvar hvør stendur. Tí er tað upp til Aksel at velja.

Tríggir møguleikar eru:

1. Samtykkja uppboðssølu við 20 atkvøðum og strika vígslu av samkyndum
2. Samtykkja uppboðssølu við 17 atkvøðum
3. Samtykkja uppskotið hjá Sambandsflokkinum við 23 atkvøðum og koyra Tjóðveldi og Framsókn til hús, útskriva nýval og vígsla av samkyndum dettur burtur.

Tað er væl hugsandi at alternativ 3 er nógv tað frægasta fyri javnaðarflokkin, tí tað er ikki óhugsandi at Heðin Mortensen hevði fingið eitt gott væl og javnaðarflokkurin sleppur harvið eisini undan innanflokka ósemjum, sum kunnu kosta nógv tá val er aftur.

Men í politikki kann alt henda og tí er ilt at spáa um, hvussu leikur fer. Sjálvt um tað nú, at síggja til, bert eru 3 leiðir at velja í millum.