Mong spáddu flokkinum stutta livitíð
Um hesa tíðina, kl. gott tíggju á kvøldi, fyri 25 árum síðani, varð greitt, at Miðflokkurin varð vorðin umboðaður á Løgtingi fyri fyrstu ferð. Gleðin var ómetaliga stór hjá teimum djørvu monnum og kvinnum, sum i tvey ár høvdu trúð og virka fyri visiónini. Tordur Niclasen og eg vórðu valdir á Løgting sum fyrstu umboð floksins.
Mong spáddu flokkinum stutta livitíð, men so varð ikki. Í dag livir hann sítt virkna lív sum ongantíð fyrr og ger seg tilreiðar til at stilla upp til sítt 8. Løgtingsval.
Hyggja vit í avrikslistan, so má sannast, at flokkurin hevur ríkað Føroyar. Nevnast kunnu frælsu kringvørpini, fríu skúlarnir, bjargaðu børnini (fosturtøkutal, ið er fallið frá áttati til knappliga tjúgu), umboðsmansstovnurin, ávirkanin á aðrar flokkar- og vit kundu hildið á.
Ein stór, hjartans tøkk til øll tykkum, sum trúføst hava staðið í verjugarðinum um flokkin. Tað hevur og er ikki lætt- nei á ongan hátt, tí mong megna ikki at skilja drívmegi okkara.
Ein vøkur og rámandi definitión uppá tey, sum stuðla og velja flokkar, ið hava kristnu menniskjafatinina fremst, ljóðar soleiðis:
"men tá á stendur, kann verða í dagliga meldrinum ella tá val eru, tá fara hesi uttan trupulleikar ímóti sínum politisku, fíggjarligu, samfelagsligu og tjóðskaparligu áhugamálum, fyri at fremja tað, sum er nógv týdningarmiklari- at grunda sína tjóð á trygga, kristna støðið".
Enn einaferð takk øll somul! Vit vóna og síggja fram móti einum góðum løgtingsvali 2019!
Jenis av Rana
Mest lisið í farnu viku
Samband
Heygsvegur 8
490 Strendur