Útróðrarflotin verður skjótt lagdur tí eingir dagar eru eftir
Meðan útróðrarmenn ikki sleppa at fiska, eru loyvi givin til fiskiskap við ferðafólkum.
Tað hevur gingið væl hjá útróðrarbátunum í ár, men nú fara dagarnir at ganga undan.
Teir báðir bólkarnir 5A, sum eru fultriknir útróðrarbátar og 5B, sum eru ikki fultrikinir útróðrarbátar, eiga tilsamans 8.879 fiskidagar í ár.
Hesir dagarnir eru býttir soleiðis, at bólkur 5A eigur 3.552 dagar og bólkur 5B eigur 5.327 dagar.
Men nú hava teir sum eiga bátarnar fingið bræv frá myndugleikunum um, at fáir dagar eru eftir. Sambært heimasíðuni hjá Vørn hevur bólkur 5A brúkt 2.278 dagar og bólkur 5B hevur brúkt 3.012 dagar. Vørn sigur, at hesi tølini eru ikki altíð dagførd, og tí kann tað vera, at fleiri dagar enn hetta eru brúktir.
81 fult riknir útróðrarbátar eru í Føroyum, og útróðrarmenn sum R7 hevur tosað við siga, at teir rokna við at kunna rógva út í umleið ein mánað afturat í ár.
Fyrr var fiskiárið frá september til august, men síðani nýggja lógin um sjófeingi kom í gildi, verður fiskiárið roknað frá januar til desember. Hetta merkir, at útróðrarbátarnir sleppa ikki til fiskiskap aftur fyrr enn 1. januar 2020.
Ferðafólk sleppa at fiska
Men onkur undantøk eru tó. Fiskimálaráðið hevur fyri stuttum skrivað út 4 loyvi til ferðavinnu-fiskiskap. Loyvini eru latin fýra feløgum og einstaklingum, sum tilsamans reka 9 útróðrarbátar, ið verða brúktir til fiskiskap við ferðafólkum.
Vit hava roynt at fingið eina viðmerking frá Høgna Hoydal, landsstýrismanni, men hann er staddur á Oyggjaleikunum á Gibraltar og tekur ikki telefonina.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur