Landsverk: Eiga at gera fleiri súkklubreytir
Hóast tær mongu brekkurnar og veðurlagið eru ein avbjóðing, so sær Landsverk stórar møguleikar í súkkling í Føroyum.
Landsverk mælir til, at farið verður undir at betra um møguleikarnar at súkkla í Føroyum.
Í framhaldinum av Samferðsluætlan 2018-2030 stendur, at samstarv eigur at verða skipað millum Landsverk, kommunur og aðrar viðkomandi partar, soleiðis at ein samanhangandi súkkluætlan kann fremjast í verki.
Víst verður á, at við eini samanseting av serligum gongu- og súkklugøtum og við landsvegum, har ferðslan er lítil, ber til dømis til at bjóða ferðafólki at uppliva Føroyar á ein øðrvísi hátt.
“Um vit ikki velja at síggja veðurlagið og brekkurnar sum forðingar, kunnu Føroyar gerast eitt serstakliga hugtakandi og dámligt land at ferðast á við súkklu,” sigur Landsverk.
Stovnurin vísir til heimsmálini hjá ST, har heimsmál nummar trý er at tryggja øllum heilsugott lív og at virka fyri trivnaði fyri øll í øllum aldri. Landsverk sigur, at hetta millum annað kann gerast við at stuðla undir eitt rørsluvinarligt undirstøðukervi. Tí verður í framhaldinum av Samferðsluætlan 2018-2030 mælt til, at 10 milliónir krónur verða játtaðar árliga til at betra um súkklumøguleikarnar í Føroyum.
“Peningurin kann vera ein pulja, har til ber at lata stuðul til verkætlanir, sum land og kommunur gera í felag, og eisini í samstarvi við Fólkaheilsuráðið, ferðaskrivstovur og aðrar viðkomandi partar,” sigur Landsverk.
Alt Framhaldið av Samferðsluætlanini 2018-2030 kann lesast á heimasíðuni hjá Landsverki.
Mest lisið í farnu viku
Samband
Heygsvegur 8
490 Strendur