Hondbóltsfeløgini StÍF og Tjaldur fara at samstarva
Felags lið, felags venjara og felags venjing.
Grannafeløgini í hondbólti, Tjaldur og Stranda Ítróttarfelag (STÍF) hava gjørt av at samstarva. Í fyrstu atløgu snýr samstarvið seg um 1-3 felags umgdómslið. Hini liðini hjá feløgunum báðum fara eisini at venja saman við jøvnum millumbilum, stendur í einum tíðindaskrivi frá feløgunum.
Samstundis hava Tjaldur og StÍF gjørt avtalu við danan Mads Lindkvist, um at verða nýggjur ungdómsvenjari hjá Tjaldri og leikari á mansliðnum hjá StÍF fyri komandi tvey kappingarárini.
Mads Lindkvist er 24 ára gamal og hevur drúgvar royndir sum hondbóltsvenjari í hondbóltsfelagnum í Hillerød á Sælandi. Eisini hevur hann spælt við fyrstaliðnum hjá felagnum, sum spælir í 2. deild í Danmark.
Umframt at hava yvirskipaðu ábyrgdina av allari hondbólts- og styrkivenjing hjá Tjaldri, hava venjaraskeið, leggja venjingarskráir og vera stuðul og vegleiðari hjá hinum venjarunum, fer nýggi venjarin at venja einstøk lið, við serligum denti á at venja og samansjóða nýggju felags Tjaldur/StÍF-liðini. Eisini fer hann at venja og spæla við á mansliðnum hjá StÍF.
Aage Arnoldson og Alexandur Johansen, formenn í Tjaldri og StÍF, siga, at feløgini gleða seg nógv til nýggja samstarvið. Við at standa saman røkka vit longur enn hvør sær, og fara í felag at bera hondbóltin í økinum enn longur framm.
“Hetta stig er nú tikið, og vónandi verður undirtøkan fyri hondbóltinum í økinum og í kommununum rundan um fjørðin enn størri í komandi árini,” siga Aage Arnoldson og Alexandur Johansen.
Mest lisið í farnu viku
Samband
Heygsvegur 8
490 Strendur