13 fakfeløg hava tikið stig til at gera eina kanning, sum lýsir í hvønn mun lønardumping og óskipað viðurskifti eru ein trupulleiki á føroyska arbeiðsmarknaðinum.

Feløgini siga, at ábendingar eru um, at vit í Føroyum møguliga hava nakrar av somu trupulleikunum við óskipaðum viðurskiftum á arbeiðsmarknaðinum, sum vit ofta frætta um úr øðrum londum.

Tí hava fakfeløgini tikið lógvatak saman, og hava sett sær fyri at fáa kannað, í hvønn mun lønardumping og óskipað viðurskifti eru ein trupulleiki á føroyska arbeiðsmarknaðinum.

Talan er um eina skjóta kanning, har eitt kanningarfólk hevur arbeitt í fýra mánaðir, við bæði at kanna og skriva frágreiðingina. 

“Av praktiskum orsøkum hevur kanningin verið avmarkað til útvald øki, og er valið fallið á tvey øki við serligum avbjóðingum, nevniliga ta skjótt vaksandi hotel- og matstovuvinnuna og um útlendingar í byggivinnuni,” siga tey 13 feløgini. Tað er Liljan Weihe, fjølmiðlafólk og samfelagsfrøðingur, sum hevur gjørt kanningina fyri feløgini.

Frágreiðingin verður løgd fram í Smæruni í Havn, mánadagin 5. aug. Kl.10.00.

Tey 13 fakfeløgini sum standa aftanfyri kanningina eru:

Føroya Handverkarafelag, Starvsmannafelagið, Havnar Handverkarafelag, Felagið Føroyskir Sjúkrarøktarfrøðingar, Havnar Arbeiðarafelag, Føroya Pedagogfelag, Føroya Arbeiðarafelag, Havnar Arbeiðskvinnufelag, Heilsuhjálparafelag Føroya, Akademikarafelag Føroya, Heilsurøktarafelag Føroya, Føroya Lærarafelag og Føroya Fiskimannafelag.