“Tað hevur stóran týdning fyri arbeiðsfólk, at greið mørk er millum, hvussu leingi vit arbeiða, hvussu leingi vit hava frí, og hvussu leingi vit sova.” Tað sigur Starvsmannafelagið, sum hevur valt sær 6 ymisk kjarnumál, sum felagið varpar ljós á, nú valár er.

Regin Berg, stjórnmálafrøðingur, sum hevur samskipað verkætlanina, greiðir í stuttum videobrotum frá kjarnumálunum. Um kjarnumál 4, sum snýr seg um mørkini millum arbeiði og frítíð, sigur hann soleiðis:

(síggj videobrotið her)

Starvsmannafelagið sigur, at líka síðani løntakarar fóru at skipa seg í fakfeløg hevur tað verið eitt aðalmál at fáa samanhangandi hvíld og frítíð, ið loyvir einum at gera annað enn at arbeiða. Men hóast sáttmálar og arbeiðsmarknaðarlóggáva stuðla hesum, eru í dag greið tekin um, at mørkini eru farin at kámast, og at javnvágin sostatt er komin undir trýst.

Starvsmannafelagið mælir til, at arbeiðsgevarar og politiska skipanin seta hóskandi tiltøk í verk, sum kunnu tryggja, at markið millum arbeiðslívið og frítíðina ikki verður skeiklað.