Flest børn, heili 76, byrja í fyrsta flokki í Klaksvík í komandi viku. Á Skúlanum á Fløtum byrja 73 børn í fyrsta flokki, og so fordeilir restin av børnunum seg yvir landið alt. Nakrir skúlar fáa ongar næmingar í fyrsta flokk í summar; teir eru skúlarnir í Fámjin, Kunoy, Haraldssund, Húsar/Syðradal og Skálavík. Tað skrivar Skúlablaðið. 

Tað eru í høvuðsheitum børn fødd í 2012, sum nú fara í skúla. Sambært Skúlablaðnum vóru 607 børn fødd í Føroyum í 2012, men nú sjey ár seinni eru næstan 100 børn fleiri løgd til árgangin.

TIlsamans eru 44 fólkaskúlar í landinum og teir eru í øllum støddum. Tríggir skúlar í landinum hava yvir 500 næmingar. Teir eru Skúlin á Fløtum, á Skúlatrøð og Eysturskúlin. 16 skúlar hava millum 100 og 500 næmingar, meðan 25 skúlar hava færri enn 100 næmingar. Av teimum 44 skúlunum eru tríggir frískúlar, og teir hava tilsamans 197 næmingar, tveir av frískúlunum hava eisini forskúla, skrivar Skúlablaðið.