Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Lýsing
Lýsing

Tobbi er greiður

Innanlands, Lesarabrøv | 17/08-2019 23:15

Kemur Tobbi inn á Føroya løgting, ætlar hann sær at sita í tveimum størvum tað sum eftir er av kommunala valskeiðnum. Tað skrivar Tobbi m.a á facebook vanga sínum í kvøld- les alt her

Iacta alea est

Táið eg sum tannáringur, miðskeiðis í sjeytiárunum í hinari øldini, limaði meg inn í Eysturoyar Tjóðveldisfelag, var tað ikki tí at eg ætlaði mær eitt politiskt lív. Orsøkin var bert hugsjónarlig. Fyrsta greinin í stevnuskrá floksins – samtykt á stovningarfundi – í 1948 – var løðarsteinurin:

„Føroyska tjóðveldið verður stovnsett við fólkaræði í politiska, vinnuliga, sosiala og mentanarliga lívi landsins. Einki útlendskt vald eigur nakran rætt til ræði og ognir í landinum. Føroyar verða loystar úr øllum útlendskum bondum, soleiðis sum føroyska tjóðin avgjørdi á fólkaatkvøðuni 14. september 1946. Heldur ikki eigur nakar einstaklingur ella nøkur serstøk stætt framíhjárætt til vald landsins og ognir. Føroyingar allir eiga somu samfelagsrættindi og hava somu samfelagsskyldur.“

10 ár seinri – í 1984 – komu nakrir av bygdarmonnum mínum, teir sum varðaðu av Tjóðveldisflokkinum í økinum, umborð á skipið, sum eg førdi, og teir vóru ikki ørindaleysir. Ynsktu at fáa meg á listan til løgtingsvalið tað árið. Hetta var ein rættilig avbjóðing hjá einum 28 ára gomlum skipara, men teir volaðu. Tað rakk til eitt triðja pláss eftir Signari á Brúnni og Peturi Reinert. Harvið var sjólívið bjargað.

1998 gjørdist eitt ár, sum vendi øllum á høvdið. Eftir at Signar á Brúnni varð valdur landsstýrismaður í mentanarmálum kom eg á ting og var sum tingmaður, landsstýrismaður í menta- og fiskivinnumálum og fólkatingsmaður ein partur av politisku skipanini fram til 2011, táið eg valdi at gevast og bleiv havnarmeistari við Runavíkar havn. Seinastu skjótt fýra árini havi eg verið borgarstjóri í Runavíkar kommunu - umboðandi ein borgaralista í økinum har ið eg búgvi.

Flokkurin í oynni hevur í longri tíð dyrgt eftir at fáa meg innaftur á politiska pallin og ivasemið hevur verið stórt. Stutt fyri evsta mark valdi eg kortini at dugna flokki mínum og tók av. Sum maðurin segði – Cæsar, táið hann fór um ánna Rubicone: „Iacta alea est.“ Terningarnir eru kastaðir. Nú má svíða sum svøllur.

Tjóðskaparmálið er meginmálið. Tørvur er á tjóðskaparligari sjálvsvirðing. Tað ber ikki til, at eitt av heimsins ríkastu londum framhaldandi ikki er annað í heimssamfelagnum enn hjáland hjá øðrum landi. Tí er málið, at Føroyar gerast ein statur millum statir. Kortini eftir eini skipaðari rás. Danska ríkisveitingin eigur sum skjótast at vera niðurlaðað. Farast skal undir at fáa løgreglu og dómsvald undir føroyskt ræði og uttanríkispolitikkurin skal fáast á føroyskar hendur. Umráðandi er, at Tjóðveldisflokkurin á valinum um 14 dagar fær somikið av politiskum magni, at tað ikki slepst undan einari gongd, sum setir ferðina munandi upp í tjóðskaparpolitisku gongdini fram ímóti at ein føroyskur statur verður skipaður um tjóð okkara.

Vinnupolitikkur og mentanarpolitikkur hava av góðum grundum mín stóra áhuga. Havi verið landsstýrismaður í báðum geirum. Ein greiður vinnupolitikkur má setast á skrá og fiskivinnunýskipanin, sum í ov stóran mun er merkt av politiskum neyðsemjum, eigur í størri mun at vera bøtt soleiðis, at hon verður ein marknaðargrundað vinnuskipan til gagns fyri vinnuna, fiskimenninar og samfelagið. Tjóðarlaðingin á mentanarøkinum er alt avgerandi fyri savningarmegina millum fólk – høpið sum ger, at tjóðin kann standa uppi á øllum mótum. Harumframt er tað umráðandi, at sosialu javnvágirnar í samfelagnum verða stýrdar soleiðis, at tjóðin ikki liðast sundur í vinnarar og taparar.

Eysturoyar Tjóðveldisfelag hevur heitt á meg um at stilla upp. Oyggin hevur sum er onga megi í landspolitiska geiranum. Tjóðveldisflokkurin hevur onki umboð havt í 8 ár á tingi, og nú er løtan komin hartil, at oyggin fær sín rímiliga part av landsins íløgufæi tey næstu árini.

Skuldi borgarstjórin í Runavíkar kommunu verið valdur á Føroya løgting um tvær vikur, ætlar hann at sita sum borgarstjóri tað sum eftir er av kommunala valskeiðnum, um býráðið annars gevur honum heimildina til tað.

Vónandi fær Tjóðveldisflokkurin somikið dygga undirtøku á løgtingsvalinum, at hann kann halda fram við at leggja kósina - sum ræður um at røkka sjálvræði føroyinga í øllum lutum.

Gott val.


Meiningar og hugleiðingar ið verða bornar fram í hesum lesarabrævið, umboða ikki meiningar, áskoðanir ella sjónarmið hjá leiðsluni í R7 Kringvarp.

Lagt út: Birgir Waag Høgnesen
Lýsing
Mest lisið í farnu viku
Vagnur Michelsen: Sambands­flokku­rin má ikki gera sama brølara enn einaferð
Sverri verður lyftur
Erla Olsen ( eldra ) vald til Ársins borgara í Vestmanna 2019
Vespureiðrið (120) - 16. sept 2019
MYNDARØÐ: Jenis av Rana sat einsamallur í samráðingarrúmi­num í 55 minuttir
Jenis av Rana verður landstyris­maður í uttanríkismálum
Ljóðupptøka: Tá Bárður á Steig Nielsen tók við sum løgmaður
Ljóðbrot: Sendistovur í Japan og Ísrael
Nakrir spurningar til Karin Kjølbro
Samrøða: Kristina Djurhuus Christiansen hevur verið ferðaleiðari í Tibet
Samrøða við Jørgen Niclasen. Eg var ikki bangin tá Bárður fór at tosa við CE og F
Ljóðupptøka: Tá Jógvan á Lakjuni tók við sum tingfor­maður
Samrøða: Búi Tyril hevur búð uttanlands í fleiri ár og útgevur ymisk tíðarrit
Dómur móti Noreg í Evropeiska manna­rættindadómstólinum
So bar ikki til longur - kinkur er komin í samráðingar­nar
Ljóðbrot: Elsebeth Mercedis Gunnleygsdóttur fegin um at hava fingið almannamál
Metis - Øll sendingin - 17. sept 2019
Fyrsta reikferða­skipið við X-bógvi latið eigarunum
MYNDARØÐ: R7 myndir frá samráðingu­num í millum BCE og F
Rák (40) Pál Weihe um heilsu og heilsuverk í 21. øld
Samrøða við Johan Lútzen: Tað verður AB og H og ikki BCE og F
Tórhallur við Gil: Hvar er samanhangu­rin?
Samrøða við Bárð Nielsen: Semjan var gjørt við A og H meðan eg var á fundi við CE og F
73 ár síðan føroyingar vrakaðu loysingina
Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Nýggjastu tíðindi