Olaf Fríðheim stillar upp: - Eg má verja borg

Gjáarmaðurin Olaf Fríðheim bjóðar seg fram fyri Tjóðveldi til løgtingsvalið komandi. Olaf er búsitandi á Eiði, og fyri hann hevur tað týdning, at eiðisfólk hava eitt tjóðveldisumboð at velja, tá ið krossurin skal setast. 

- Eg havi fingið nógvar áheitanir seinastu tíðina, og av tí, at eingin er uppstillaður fyri Tjóðveldi á Eiði, men fýra valevni fyri aðrar flokkar bjóðaðu seg fram, so helt eg, at tjóðveldisfólk eisini skulu hava eitt lokalt valevni at seta sín kross við, sigur Olaf Fríðheim. 

Olaf hevur verið tjóðveldismaður alt sítt lív, og hevur sitið tvey skeið í bygdaráðnum við Gjógv, tá ið Gjógv var ein sjálvstøðug kommuna, og einu setuna sum bygdaráðsformaður. Í dag situr Olaf Fríðheim í bygdaráðnum á Eiði. 

- Fyri meg hevur tað týdning, at vit gera okkum sjálvstøðug sum tjóð. Vit mugu niðurlaga blokkstuðulin og tá ið hann er burtur, so eru bara nøkur fá málsøki eftir. Og so skal fólkið siga sína hugsan á fólkaatkvøðu um ríkisrættarligu støðu føroyinga, sigur Olaf Fríðheim. 

Harnæst vísir hann á, at skalt tú byggja hús uttanfyri Havnina, so ert tú at kalla konkurs sama dag tú flytur inn, tí húsini kosta meira enn tey verða virðismett til. 

- Tað skal vera møguligt at byggja og búgva runt um alt landið. Vit skulu tí hava Bústaðir at byggja fleiri luta- og leiguíbúðir kring landið, eisini so, at eldri fólk kunnu sleppa úr sínum stóru húsum í smærri íbúðir, sigur Olaf Fríðheim. 

Olaf er 55 ára gamal og er giftur Súnfríð. Saman eiga tey trý vaksin børn. Olaf starvast til dagligt sum pakkhúsformaður hjá Smyril Line.