Taunus 17M í Vestmanna
Sunnudagin 14. apríl, ein konfirmatiónssunnudag, stóð ein gamal Taunus 17M á plássinum hjá Vestmanna Skipasmiðju. Hann hevur ivaleyst staðið har áðrenn 14. apríl í 2019, og hann stendur saktans enn.
So hugfarsligt at síggja henda gamla – minst 56 ára gamla – Taunis-bilin standa har so bringubrattur, men røktar-tørvandi, tann sunnudagin í Vestmanna. Taunus 17M-modellið var ein vanligur hýruvognur í Føroyum tá fyrst í trýssunum, serliga á øllum bilstøðunum í Havn. Annars var bilurin eitt væl dámt familjumodell.
Bilurin varð framleiddur hjá Ford í Týsklandi í fleiri bilættarlið: Tað fyrsta frá 1957 til 1960, annað frá 1960 til 1964 (hesin reyði við svørtum taki í Vestmanna er frá teirri tíðini). Triðja ættarlið var frá 1964 til 1967, fjórða frá 1967 til 1968, og fimta ættarlið koyrdi frá 1968 til 1971.
Bilurin fekk heilt nýtt karossarí og eina heilt nýggja og kollveltandi útsjónd. Motorurin varð betraður við automatkjokara, dupultum karboratori og 1,8 litra motori. Hesin bilurin varð seldur í ymsum variantum inntil 1964.
Teir seinnu árgangirnir vórðu haraftrat bøttir við skivubremsum framman og fýra gearum – í staðin fyri trý. Sum eykaútgerð fekst trippteljari, forkromaður afturpartur, bakkiljósi og saxomati, ið var ein hálvautomatiskur gearkassi uttan kobling. Gearið varð skift við einum knøtti á gearstongini.
Samstundis við at Taunus 17M kom fyrst í trýssunum, komu nýggj modell av Taunus 12M og 15M. Hesir høvdu eitt sindur minni og meiri fýrakantað karossarí. Tað heilt serliga við hesum modellunum var, at tey høvdu V4-motor við forhjulstrekki, eitt sum var ógvuliga óvanligt fyri hesa tíðina.
Tann einsamalli reyði Taunus 17M-bilurin í Vestmanna er avmyndaður her í blaðnum. Hann sá soleiðis út fermingarsunnudagin 14. apríl 2019:
Greinina og myndirnar eigur Sonne Smith. Greinin stendur í blaðnum hjá felagsskapinum Føroya Ellisakfør, sum kom út Juni 2019 - 27 árgangur
Mest lisið í farnu viku
Samband
Heygsvegur 8
490 Strendur