Veðurlagsbroytingarnar gerast alsamt sjónligari og fáa alsamt størri ávirkan á heimssamfelagið, plantur, djór og okkum menniskju. Lívfrøðiliga margfeldið er hótt, veiða av fiski og fugli er ikki altíð burðardygg, aling dálkar okkum firðirnar, føroyska útlátið av vakstrarhúsgassum er enn í øking, og hvørt ár endar ein rúgva av plasti í føroysku náttúruni. Hetta eru nakrir av teimum átroðkandi umhvørvistrupulleikunum í dag. Tað skriva umhvørvisfelagskapirnir, sum fyriskipa fólkafundin.

Saman kunnu vit gera mun í mun til umhvørvisvernd og veðurlagsbroytingar! Men til tess krevst, at vit velja fólk at umboða okkum, ið veruliga ynskja at taka hond um hesar átroðkandi umhvørvistrupulleikar. 31. august verður aftur løgtingsval, og tá er tað altavgerandi, at vit fara á val og bera so í bandi, at komandi løgtingsfólk taka umhvørviskreppurnar í álvara og gera neyðugu átøkini fyri at basa teimum, skriva Føroya Fuglafrøðifelag, Føroya Náttúru- og Umhvørvisfelag og Ringrás. 

Fólkafundurin verður í Viðarlundini í Havn 24. august kl. 16. Á skránni verða røður og tónleikur. Kaffi og te verður eisini bjóðað, men heitt verður á fólk um at hava egnan kopp við.

Silja Johannesen og Rani Nolsøe fara at spæla nøkur løg og røðararnir eru:
Magnus Gaard, lívfrøðingur
Guðrun Zachariasen, lækni
Katrin Petersen, Veltan
Jógvan D. Hansen, heimspekingur
Hjálmar Hátún, havfrøðingur