Føroyaflokkurin vil hava frælsi aftur til føroyingin. Vit í Føroyaflokkinum eru troytt av, at tað almenna skal stýra okkara lívi. Á hvørjum ári verða uml. 150 lógarbroytingar gjørdar í Løgtinginum. Stórur partur av teimum eru púra óneyðugar. Føroyaflokkurin ynskir, at land, almennir stovnar og kommunur fáa minni leiklut í samfelagnum. Vit vilja frælsi til føroyingin. Tí fara vit m.a. at arbeiða fyri at:

- Avtaka 1-5 lógir um árið, og harvið geva Føroyum eitt frælsari lív. Fleiri lógir merkja bara størri fyrimunir til skrivstovuveldið.
- Avtaka kringvarpsgjaldið og miðlastuðulin. Tí hví skulu vit tvingast til at rinda til hendan vinstravenda stovn? Vit vilja at tað skal verða upp til hvønn einstakan at taka støðu til. 
- Avtaka Rúsdrekkasøluna. Hví skulu vit tvingast inn í eitt alment monopol at keypa, tá tað privata klárar tað bæði betur og bíligari? 
- Loyva privatu vinnuni inn á distributiónsneti hjá SEV (eins og gjørt er við tað hjá Føroya Tele). Hví skal man hava eitt alment monopol, tá tað privata kann klára tað betur og bíligari? 
- Avtaka kravið um loyvi til at fara í grind. Tað hevur ikki verið neyðugt í fleiri harrans ár. 
- Avtaka reglurnar um hvítvask. Hví skal man verða kriminaliseraður fyri at hava reiðan pening? 
- Avtaka avlurtingarpakkan.
- Avtaka byggireglurnar, sum ikki loyva, at man kann byggja út ella byggja nýtt, uttan at kommunan skal hava tekningar frá arkitektum fyri fleiri tíggjutúsund krónur. 
- Avtaka Bústaðir, tí tað privata klárar tað bæði betur og bíligari. 
- Avtaka Posta, tí tað privata klárar tað bæði betur og bíligari. 
- Selja ognarlutin hjá tí almenna í Bank Nordik.

Útveita so nógv sum møguligt hjá tí almenna. Nógvar tænastur, sum landið, stovnar og kommunur veita, kunnu veitast av tí privata.

Vel Føroyaflokkin, um tú ynskir eitt einfaldari, fríari og bíligari samfelag.

Hjalmar Zachariassen