Eitt klemm kann gera allan munin
Sjálvstýri vil hækka játtanina til viðgerðartilboðini fyri rúsdrekka- og rúsevnamisnýtarar

Undir valstríðnum hevur verið høvi til at  møta áhugabólkum og fáa innlit í, hvussu teir hvør í sínum lagi síggja verðina og hvat teir halda eigur at vera gjørt frá politiskari síðu á teirr øki. Slíkt ger altíð inntrykk – og sumt fær ein at skilja ymisk viðurskifti betur og kanska broyta støðu.

Einki hevur kortini gjørt so stórt inntrykk upp á meg sum hetta at møtast teimum, sum royna at lofta og lyfta tey, sum hava rúsdrekka- og rúsevnatrupulleikar. Har lívið hevur mist endamál og kós. Har doyving av tilverupínuni er vorðin ein útvegur. 

Glóðin má ikki  slókna
Ein daglig dosis av antin rúsdrekka ella rúsevnum er vorðin ein fortreyt fyri at kunna koma ígjøgnum dagin og náttina. Tað var skelkandi og hjartanemandi hoyra, at tað ikki bara eru vaksin, sum eru í hesi støðu. Alt fleiri ung eru í hesi støðu, og eisini børn – heilt niður í 12 ára aldur!

Hví tilveran hevur artað seg soleiðis, man vera so ymiskt, men eingin hevur sett sær fyri at koma soleiðis fyri. Og onkunstaðni innast inni – millum skommina, ómegdina og døkku skýggini – livir hon: vónin um at reisast aftur. Og jú, tey mugu vilja tað sjálvi – men glóðin má hirðast, so hon ikki slóknar av minsta lotinum.

Eitt klemm kann gera allan munin fyri misnýtaran – munin ímillum at fella í fátt og at fetta sær á.

Rakar eisini  børnini
Vit hava stovnar, sum hava viðgerðartilboðini, og teir hava dugnalig fólk við fakligu vitanini og menniskjansligu innfølingini, sum krevst fyri at hjálpa teimum, sum misbrúka rúsdrekka og rúsevni. Og tann hjálpin røkkur longur enn so, tí í allarflestu førum ávirkar misbrúkið eisini tey nærmastu – ikki minst børnini.

Seinastu árini er játtanin til viðgerðarstovnar vaksin. Framløgurnar og samrøðurnar við tey, sum brúka sítt lív uppá at taka ímóti misbrúkarunum, at vera um teir, at viðgera teir o.s.fr. hava sannført meg um, at helst hava hesir stovnar verið undirfíggjaðir alla tíðina. 

Tað er eingin ivi um, at trupulleikin av rúsdrekka- og rúsevnamisbrúki er vaksin og helst vaksandi. Vit skulu gera alt, vit kunnu fyri at skapa liviumstøður, sum minka um vandan fyri at fólk yvirhøvur koma út í rúsdrekka- og rúsevnamisnýtslu. 

Vit kunnu ikki standa og hyggja at
Men vit kunnu ikki standa og hyggja at, meðan verandi misbrúkarar ikki fáa ta viðgerð, ið krevst, bara tí pengarnir ikki strekkja til. Tí má og skal játtanin til hesi viðgerðartilboðini hækka. Sjálvstýri fer at at gera alt fyri at fáa eina upphædd, ið ger mun fyri misbrúkararnar og teirra avvarðandi. 

Alt annað hevð verið ósømiligt, tá ið man hevur hoyrt dømini um lagnurnarhjá nøkrum av okkara samborgarum.

Kristin Michelsen
Sjálvstýri