Gott og væl 775 luttakarar fara at renna og ganga úr Gásadali til Sandavágskirkju komandi leygardag, men rúm er fyri fleiri til Føroya vakrastu hálvmaraton, tað boðar Frælsi frá í tíðindaskrivi.

Fyrireikararnir vilja eisini gera vart við, at vegurin er stongdur frá Flogvøllinum til FK í Miðvági leygardagin kl. 11:30-13:00.

Hesa ferð vænta fyrireikararnir eina frálíka tíðtøku, sum spurto.com stendur fyri, stuðla av Luna, ið er høvðusstuðul hjá Føroya vakrasta hálvmaraton. Og tey vænta meira tónleik á rutuni bæði livandi og diskarar. 

Frælsi sigur seg royna at hugsa um byrðardygni og umhvørvið í sambandi við tiltakið. Stuðul verður latin Krabbameinsfelaginum og Beranum. Vága Bjargingarfelag  fær eisini stuðul fyri dygga tænastu á hvørjum ári. Rennitroyggjan, sum minni um renningina, kann nú keypast, tí tað er ein sannroynd, at øllum okkara tørvar ikki eina nýggja rennitroyggju. Og eingin gávuposi er við ymiskum smálutum heldur. Tó so medalju fáa vit enn og Myndaboksin vitjar, so vit øll kunnu fáa eina mynd sum minni frá degnum. Køkstoymið, sigur seg vera til til dystin fús at fara frá einnýtisíløtum til at vaska upp, sigur Frælsi á heimasíðu síni. 

Tiltakið hevur lokalar røtur, stuðla av vágafólki og fyritøkum virknum í Vágum. Fyriskiparnarir fyri tiltakinum er felagið fyri frælsan ítrótt í Vágum, Frælsi. Felagið varð stovnað í 2004.  Í dag er Frælsi við til at fjøltátta frítíðartilboðið í Vágum.

Til ber at tekna seg ti Føroya vakrastu hálvmaraton umvegis heimasíðuni hjá Frælsinum her.