Eitt av tiltøkunum er, at Anna og Óli Rubeksen, sum hava heimablídni á Velbastað, fara at bjóða ræsta súpan, og leggja fram um nýggju bókina ‘Tá ókunnufólk kom á leið’. Fyrilesturin byrjar kl. 14.

Anna og Óli, ið hava garðin undir hond, eru 9. ættarlið. Tey hava røkt garð og fenað á siðbundnan hátt í mong ár.

Við rákinum um norðurlendska matmentan búnaðist tankin um at seta serføroyskan mat eftir føroyskum uppskriftum á borðið fyri gestum. Tey settu sær fyri at bjóða gestum inn at smakka ein góðan bita av Føroyum.

Hetta eydnaðist betur, enn tey høvdu droymt um, og bóndaskapurin fekk skjótt ein nýggjan hugfarsligan kvist: góðan vertskap saman við gestum, ofta fremmandafólkum, ið vilja sleppa at uppliva og njóta góða samveru í einum føroyskum heimi. Fyri sítt arbeiði tóku Anna og Óli ímóti norðurlendsku Emblu-virðislønini í bólkinum "Matferðamál" í 2017.

Bókin greiðir frá rávørunum, nýttar verða, og arbeiðnum, sum verður lagt í. Vit fylgja ársringrásini við fenaði og gróðri, hvussu alt veksur og búnast, til tað endar á borðinum í fjálgari stovu við útsýni yvir firðir og oyggjar.