Støðan hjá avvarðandi hjá fólki við demensi skal kannast
Granskingarráðið hevur játtað stuðul til eina verkætlan hjá Alzheimerfelagnum, sum kallast: ”Spurnakanning um støðuna hjá avvarðandi til fólk við demens”.
Stuðul er játtaður frá høvuðsøki 1 hjá Sjúkrakassagrunninum, og stuðulin er kr. 150.000. Tað skrivar Granskingarráðið á heimasíðu síni.
Alzheimerfelagið metir, at tað er av alstórum týdningi at seta sjóneykuna á støðuna hjá avvarðandi hjá fólki við demensi. Demens er ein sjúka, sum eisini rakar tey avvarðandi og eru tey ofta ein gloymdur bólkur. Kanningar uttanlands vísa, at leikluturin sum avvarðandi til fólk við demensi kann hava negativa ávirkan bæði á heilsu og arbeiðslívi. Felagið ynskir at gera hesa spurnakanning fyri at kanna støðuna í Føroyum, soleiðis at til ber at kunna politisku skipanina, og at geva myndugleikum og stovnum neyðugu vitanina um støðuna hjá avvarðandi til at kunna gera neyðugar raðfestingarnar.
Endamálið við kanningini, sum er tann fyrsta av sínum slag millum avvarðandi til fólk við demensi í Føroyum, er at lýsa, hvussu gerandisdagurin í familjum, sum eru raktar av demensi, verður ávirkaður av demenssjúkuni – harundir hvørjar fíggjarligar, sosialar og heilsuligar avleiðingar avvarðandi uppliva sum fylgju av demenssjúku.
Sambært Granskingaráðnum er tað Maria Skaalum Petersen, sum er fakligur leiðari fyri verkætlanini. Harafturat koma tvær master lesandi í heilsuvísindum, Sára Reinert og Elisabet Anthoniussen, at arbeiða við kanningini fyri Alzheimersfelagið.
Tú kanst lesa meira um verkætlanina á heimasíðuni hjá Granskingarráðnum her.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur