Tosað verður um vinnulig áhugamál í medisinídnaðinum og um leiklutin hjá læknum. Spurt verður hvar læknin fær sína vitan um heilivág, hvussu læknaútbúgvingin er samansett og hvørja ávirkan medisinídnaðurin hevur á læknar. 

Tosað verður eisini um opioid kreppuna, sum er í mongum londum - 20 % av danum eru bundnir av opioidum og støðan er helst tann sama í Føroyum. Í sendingini hoyra vit m.a. at medisinídnaðurin er komin á marknaðin við opioidum við tí grundgeving at man ikki verður bundin av teimum. Tosað verður um álit á medisinídnaðin. Spurt verður m.a. um kannabis kann verða eitt alternativ til opioidur og Pál Weihe greiður frá sínari hugsan um kannabis sum heilivág. 

Pál Weihe er yvirlækni, leiðari á deildini fyri Arbeiðs- og Almannaheilsu, adjungeraður professari á Setrinum, formaður fyri Læknafelagnum í Føroyum og hevur í nógv ár verið altjóða viðurkendur granskari. 

Annika Bolton Mortensen er vertur í sendingini.

Seinni partur av prátinum við Pál Weihe kemur á R7 mikudagin kl. 13.