Toskurin á Føroyabanka tykist verða í menning
Magnus Heinason hevur gjørt árligu yvirlitstrolingina um heystið á Føroyabanka. Tilsamans 29 hál á ein tíma verða trolað á øllum dýpum. Reiðskapur og framferðarháttur eru óbroytt, síðan yvirlitstrolingin varð sett í verk í 1996, skrivar Havstovan í tíðindaskrivi.
Toskurin á Føroyabanka hevur verið sera illa fyri síðan 2003, millum annað tí at nógv var fiskað. Síðan 2009 hevur Føroyabanki verið friðaður, men lítið hevur verið at sæð til nakran bata hjá toskinum, hóast hýsan kom fyri seg aftur í 2017. Men nú eru ábendingar um, at toskurin á Føroyabanka er í menning. Sambært Havstovuni øktist toskaveiðan um tíman frá umleið 20 kg í 2004-2018 til 80 kg í 2019. Hetta kemst av einum hampuligum árgangi frá 2015, sum var fyrsta árið í langa tíð, at nakað var til av toskayngli á Føroyabanka. Nøgdin av toski skal tó fara upp til umleið tað dupulta, áðrenn hann er komin upp á tað stigið, sum fyrr var vanligt. Tað var framvegis sera nógv til av hýsu, skrivar Havstovan.
Frágreiðingina hjá Havstovuni kann lesast her.
Mest lisið í farnu viku
Samband
Heygsvegur 8
490 Strendur