Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Lýsing
Lýsing

Jógvan í Skorini borgarstjóri á Eiði: Framskygt bygdarráð við Hans Jákupi í Kollsbyrgi á odda

Innanlands | 16/09-2019 15:00

Tann 08.september vóru 20 ár síðan Korndalsbýlið á Eiði av fyrsta sinni lat upp. Hósdagin var ein hugnaløta har borgarstjórin helt ein stutta røðu.

Tey, sum mannaðu bygdaráðið á Eiði fyri 20 árum síðani, vóru ógvuliga framskygd.

Tey vóru:

Hans Jákup í Kollsbyrgi, borgarstjóri
Knút Vesturdal (tekniska nevnd)
Jógvan K. Mørkøre (tekniska nevnd)
Jóhan K. Joensen
Anfinnur Kruse
Anna Maria Poulsen
Edvard Pauli Ejdesgaard (tekniska nevnd)

Hesi bygdu tá Korndalsbýlið, og sigast má, at hetta heim hevur tænt bygdini meiri enn vit nakrantíð kunnu ímynda okkum.

Niðanfyri eru nøkur orð, sum borgarstjórin i segði á 20 ára degnum:

Góðan dag øll somul og hjartaliga til lukku á hesum stóra degi.

Nú eru longu 20 ár liðin, síðani Korndalsbýlið av fyrsta sinni lat upp. Og sigast má, at tað tykist als ikki so langt síðani, at hetta var eitt grønt óbygt øki.

Tá sambýlið kom, tá var talan veruliga um eina framskygda og djarva íløgu, sum tásitandi bygdaráð tók. Í okkara øki var nærum einki búpláss.

Taka vit samstarvið, sum í dag eitur VEKS, so hevði okkara øki fyri 20 árum síðani einans fá kømur í Vestmanna og annars áttu Eiðis og Sunda kommunur ein lítlan part av Ellis og røktarheiminum í Runavík. Í dag hevur hetta økið 71 búpláss.

Tískil var talan um eina stóra, djarva og neyðuga íløgu her í økinum, ein íløga sum nærum øll bleiv goldin av Eiðis kommunu sjálvari. Tá var stuðulin frá landinum als ikki tann sami, sum hann bleiv seinni.

Fyrstu tíðina var Jóhanna Fløtt leiðari, og hesa uppgávu røkti hon avbera væl. Síðani kom Helfrid framat sum leiðari, og Helfrid hevur absolutt eisini klárað avbjóðingina sum leiðari til UG.

Ofta verður sagt, at eitt samfelag verður definerað út frá, hvussu væl vit taka okkum av okkara veikaru borgarum.

Tá sambýlið kom, var tað heilt víst við tí fyri eyga, at vit skulu taka okkum av okkara eldru veikaru borgarum.

Starvsfólkini, sum starvast her, hava veruliga víst dirvi og eldhuga øll árini, og tað síggja vit framvegis í dag.

Starvsfólkini samla pening inn fyri at fara at ferðast við búðfólkunum, og eg tori at siga, at einki annað heim í Føroyum hevur slíka umsorgan og arbeiðsdirvi sum starvsfólkini á Korndalsbýlinum.

Í halgubók stendur skrivað, at vit skulu gera alt uttan at knarra og uttan at ivast, og júst hesi orð kunnu sigast um starvsfólkahópin her. Eg sum borgarstjóri og vit í stýrinum í VEKS, hava bara gott at bera tykkum, og tit eiga og fáa nógv rós í politiska landslagnum.

Men nú standa vit her 20 ár eftir, at Korndalsbýlið bleiv tikið í nýtslu. Hvat hava vit so fingið burturúr?

Jú, í dag kunnu okkara eldru borgarar njóta aldurdómin á einum heimi í heimbygdini, hetta skal og má ikki forsmáast.

Tað at vera í einum umhvørvi, sum vit kennast við, er absolutt nakað, okkara eldru borgarar eru takksamir fyri.

Vit yngru og avvarðandi kundu sjálvsagt ikki ímynda okkum nakað annað, enn at Korndalsbýlið eisini fer at gerast okkara heim seinni í lívinum.

Fyri fimm árum síðani bleiv eldraøkið lagt út til kommunurnar. Fólk eru helst ymisk á máli um hetta var ein røtt avgerð, tað lata vit liggja. Men eitt orðatak sigur, at “vit koma altíð at hava tørv á okkara eldru fyri at minna okkum á, at vit yngru við tíðini skulu koma at læra”.

Hetta er júst so. Vit hava nógv at læra, og okkara forfedrar hava heilt víst alt at læra okkum. Vit liva í nú’inum, men læra av søguni.

Mín vón er, at vit í framtíðini koma at seta enn meiri orku og fígging av til at røkja og fjálga um okkara eldru borgarar.

Allar metingar siga, at í framtíðini koma at verða munandi fleiri eldri, so eg vænti og vóni, at vit fara at duga uppaftur betur at taka okkum av øllum.

Korndalsbýlið, sum bleiv tikið í nýtslu fyri 20 árum síðani, var heilt víst eitt frambrot, men vit eiga framhaldandi at hugsa um okkara eldru borgarar. Tá var talan um hegni og dirvi frá politikarans síðu, men hesi 20 árini eru tað starvsfólkini, ið hava rikið heimið.

Hesi starvsfólkini eiga heiðurin – uttan tey var einki heim.

Hesi starvsfólkini hava skapt eitt veruligt heim.

Korndalsbýlið er heimið.

Hjartaliga til lukku enn einaferð!

Jógvan í Skrini


Lagt út: Birgir Waag Høgnesen
Lýsing
Mest lisið í farnu viku
Sjófólk leypa fyri borð av reikferða­skipum
Samrøða við Hanus Kjølbro - Tekur 1 ár at gerast skip­satstøðari á Sjónámi
Í dag lat Kunningarstovan í Nólsoy upp
Leiðreglur fyri ferðandi broyttar
RAVI ZACHARIAS - saknaður av føroyingum
Søgan um festið í Oyndarfirði
Petur Hans Dahl, veðurfrøð­ingur: Veðurvá­nir fyri hesa vikuna ( vika 23 )   
The Land of Maybe – No More
Í øðini eftir samrøðu við Trump
JUVÉL 2 - nýggj leiðsla!
Koronasmittan komin umborð á skip hjá Maersk
LÍV POULSEN ÚR SENEGAL - ein dugnaligur brævskrivari!
Úr bandasavni­num: Samrøða við Dávur Jacobsen 2. partur
Hvagar eru vit á veg?
Arbeiðsvanlukka kravt eitt mannalív
Jens Andreassen settur sum yvirlækni á Lands­sjúkra­húsinum
Twitter setir merki á boð frá Donald Trump
Brasilski forsetin noktar at taka ábyrgd
Ísurin á Norð­póli­num tiðnar skjótari enn væntað
BÍBLIU- OG TÓNLEIKATÚRUR - ein annarleiðis ferð
Lands­stýris­maðu­rin sett nýtt Fólka­heilsuráð
31. mai - Altjóða roykfríur dagur
Heilsu­frøðiliga Starvsstovan hevur kannað stýring av temperaturi undir innfrysting av fiskavørum
DRONNING ELISABETH OG PÁSKA­HÁTÍÐIN - fyri fyrstu ferð í 68 ár
Nú á R7
Samband
R7 Kringvarp
Postboks 226
FO-600 Saltangará
Starvslýsingar
Myndarøðir
Lesarabrøv
Savnið
Nýggjastu tíðindi