Børn við ADHD møta somikið nógvar fordómar og negativar impulsir í gerandisdegnum at nógv teirra fáa bæði angist og tunglyndi, tí er týdningarmikið at upplýsa um ADHD. Tað sigur Bjørg Dam, forkvinna í Føroyska ADHD felagnum. Hon greiðir eisini frá, at børn við ADHD mennast í miðal trý ár seinni í heilanum enn javnaldrar og tað kann verða torført hjá umheiminum at skilja og rúma. 

Rák snýr seg hesa vikuna um ADHD. Tosað verður við føroyska ADHD felagið og við tvey umboð frá Íslendska ADHD felagagnum - forkvinnuna, Elin Hendriksdóttir, og næstformannin, Vilhjálm Hjálmarsson, sum fekk staðfest ADHD sum vaksin.

Talið av børnum sum hava ADHD liggur millum 4% og 12%. Talið broytist frá landi til land tí diagnostiseringin er ymisk. Talið av vaksnum fólki við ADHD er nakað lægri, tí man kann vaksa frá ADHD. Tilburðir av ADHD í Føroyum eru lægri enn aðrastaðni, og føroyska ADHD felagið ber ótta fyri at hetta kemst av, at fakfólk í skúlum og barnagørðum duga ov illa at eyðmerkja ADHD. Funnist verður eisini at vantandi samstarv millum geirðar í Føroyum. 

Í sendingini verður harumframt tosað um viðgerð av ADHD, um týdningin av diagnostisering og um positivar og negativar síður av at hava ADHD. 

Annika Bolton Mortensen er vertur í sendingini.

Rák er á R7 mikudagar kl. 13.