Amerikanski forsetin, Donald Trump, hevur isolerað seg meira enn hann ætlaði, eftir at hann sunnukvøldið kunngjørdi, at amerikonsku hermenninir, sum hava stríðst saman við kurdum við markið har norðuri í Sýria, verða tiknir heim. Kurdarnir hava hjálpt amerikanarum at berja niður Islamiskan Stat í pørtum av  í Sýria.

Útmeldingin hjá Trump um amerikonsku hermenninar varð beinanvegin tikið sum grønt ljós til Erdogan og turkiska herin at berja kurdarnar í Sýria niður. Og tað hóvar ikki nógvum av republikanarunum, sum annars hava roynt at vart Donald Trump ímóti einum ríkisrættarmáli.

Ein av heykunum í Republikanska flokkinum, Lindsey Graham, kallar avgerðina hjá Trump at taka amerikonsku hermenninar heim - sum onki minni enn eina vanlukku og ein skemdarblett á umdømið hjá USA.

Norska kringvarpið, NRK, skrivar í dag, at stórur vandi er fyri einum nýggjum kríggi, nú Trump velur at taka amerikonsku hermenninar heim.

- Tað er stórur vandi fyri at Sýria kann uppliva eitt nýtt og umfatandi kríggj. Og bresta bardagar á, kunnu teir gerast rættiliga ógvusligir. Bardagarnir fara at vera í tætt-bygdum økjum, har nógv fólk fara at doyggja. Og offrini verða bæði herfólk og sivilfólk, skrivar NRK.