Felagið Heimafriður gremur seg nú aftur um larm, og hesaferð siga tey, at tað er tað Næraberg, sum larmar. Felagið Heimafriður sigur, at Næraberg nú í trý samdøgur hevur ligið og órógvað fólk á Signabø og Oyrareingjum. Heimafriður vísir til miðilin jn.fo, sum skrivar, at goymslurnar í Kollafirði eru fullar, og tí skal Næraberg ikki hava fingið landað.

Felagið vísir eisini á ein fund millum Tórshavnar kommunu og JFK, har tað varð avtalað, at ábøtur skuldu gerast á mannagongdir til frama fyri heimafriðin hjá borgarum á Signabø og Oyrareingjum. Men fólk í økinum merkja einki til narar broytingar, tí larmurin er hin samdi, sigur Felagið Heimafriður.

Hanus Hansen, stjóri í JFK, sigur við R7, at hann vil sjálvandi ikki hava, at Næraberg órógvar svøvn og annað hjá fólki á Signabø og Oyrareingjum.

- Er tað veruleiki, at skipið larmar so illa, so verður nakað gjørt við tað. Men fyrst vil eg kanna hetta málið nærri, áðrenn eg úttali meg meira um tað, sigur Hanus Hansen við R7.