Eysturkommuna hevur higartil játtað filmsfelagnum TROM 175.000 krónur. Fyrst játtaði kommunan filmsfelagnum 50.000 krónur, tað var í 2015. Tann peningurin fór til søguhugskot og menning av einari filmsverkætlan.

Tá filmsfelagið fór víðari við ætlanina at gera eina krimirøð, játtaði kommunan í 2018 filmsfelagnum TROM 125.000 krónur. Seinasti parturin av hesum peninginum, 62.000 krónur, varð goldin filmsfelagnum í mai í ár.

Í fundarbókini hjá Eysturkommunu sæst millum annað, at kommunan játtar filmsfelagnum TROM peningin, tí at filmshøvundurin og høvuðsframleiðarin er skrásettur í kommununi. Rithøvundurin, Jógvan Isaksen, sum  hevur skrivað krimisøguna, kemur eisini úr Eysturkommunu. 

Roknast kann eisini við fleiri filmsbrotum ÚR Eysturkommunu, stendur í fundarbókini.

Bæði Danmarkis Radio og BBC hava sæð ein ”brellbita” av filmsætlanini hjá TROM, og báðar støðirnar dámdu brellbitan væl.