FIMFF 2019, sum stendur fyri Faroe Islands Int'l Minority Film Festival 2019, byrjaði í dag við at flokkar úr ymsum skúlum sóu filmar um minnilutar og hoyrdu framløgur í Smæruni í Havn. Dagurin var fultteknaður, tó vóru fleiri setur tóm í salinum, tí tað vísti seg, at onkur hevði tilmeldað ein fiktivan flokk og soleiðis forðað fyri, at fleiri flokkar kundu melda seg til. Hetta skrivar FIMFF á sínum facebook vanga. Tey halda tað vera sera óbehagiligt og ikki minst eitt tekin uppá manglandi virðing fyri arbeiðinum í FIMFF og fyri minnilutum í Føroyum yvirhøvur.

Sambært FIMFF vóru innbjóðingarnar til hendan dagin bert sendar út til lærarar á ymsum skúlum. Tískil er tað onkur, ið hevur fingið hesa innbjóðing, sum hevur valt at melda ein fiktivan flokk til. Viðkomandi hevur enntá tikið sær stundir at skriva nøvnini á næmingunum, og eftir nærri eftirkanning, so finnast hesir heldur ikki, skrivar FIMFF.

FIMFF vísir á, at talan er um eina roynd at standa í vegin fyri festivalinum og at geva næmingum møguleika at luttaka í einum kunnandi degi um minnilutar í Føroyum, og í hesum førinum LGBTQ minnilutar.

FIMFF sigur at enda, at tey eru sera takksom fyri teir lærarar og tey foreldur, ið hava stuðlað teirra arbeiðið og somuleiðis síggja virði í einum tílíkum festivali í Føroyum og tey vóna, at hesi vera tey, sum fara at mynda okkara samfelag framyvir.