Nýggi Hópfíggingarportalurin hjá Íverksetarahúsinum, Vinnuframa og Visit Faroe Islands varð í gjár alment tikin í nýtslu. Íverksetarahúsið umsitur portalin í samstarvi við íslendsku fyritøkuna Karolina Fund, sum hevur ment portalin.

Á hopfigging.fo stendur, at endamálið við Hópfíggingarportalinum er at stuðla og menna íverksetan í Føroyum við at gera tað lættari hjá íverksetarum og íleggjarum at finna hvønn annan.

Har ber til at greiða frá sínum hugskoti, hvørjar ætlanir tú hevur, og síðani seta eina upphædd, sum er brúk fyri, um hugskotið skal gerast til veruleika. Verkætlanirnar skulu røkka ásettu upphæddini, fyri at verða stuðlað.

Tað eru longu fleiri, sum hava tikið av møguleikanum at skriva seg upp á hesum nýggja portalinum.

Ein verkætlan, ið longu dagin eftir er komin upp á 70% av ynsktu upphæddini, eitur Breyðvirkið. Tað eru Fríða Hansen og Randi Olsen, sum standa fyri verkætlanini. Við Breyðvirkinum ætla tær at gera breyð úr súrdeiggi, ymisk breyð úr vistfrøðiligum tilfari og hava eina opna framleiðslu.

Tað er frítt fyri hjá øllum at fara inn á hopfigging.fo og stuðla teimum hugskotunum, sum liggja frammi - ella stovna sína egnu verkætlan.