Bourbon Offshore eigur umleið 500 skip, og reiðaríið er áhugað í øllum sløgum av manning: Navigatørum, maskinmonnum, elektrikarum, kokkum og dekkarum.

Føroyingar hava siglt við Bourbon Offshore í 20 ár, og føroysku sjómenninir hava verið so væl umtóktir, at Bourbon nú kemur til Føroya at leita eftir fleiri.

Eftir altjóða niðurtúrin í oljuvinnuni í 2014 hava hvørki Bourbon Offshore ella onnur frálands-reiðarí havt tørv á at leita eftir manning. Hetta er nú við at broytast, sigur Bourbon Offshore, og tí kemur reiðaríið til føroya at leita eftir manning til mongu skip síni – og tað koma tey um eina viku.

Annfinnur Garðalíð, sum er formaður í Føroya Skipara- og Navigatørfelag, sigur, at tað fløvar, at frálandsvinnan aftur er farin at leita eftir manning.

Formaðurin í Maskinmeistarafelagum, Ólavur Gunnarsson, heldur, at hetta er gott dømi um,  at eisini føroyskir maskinmeistarar eru høgt í metum uttanlands.