Norska virkið, sum setti veingir í strandfaraskipið Teistan fyri nøkrum vikum síðani, er væl nøgt við úrslitið higartil. Umborð á Teistanum eru tey eisini væl nøgd.

Teistin er fyrsta skipið í heiminum við hesum nýggja slagnum av veingjum, ið skulu syrgja fyri, at tað rullar minni umborð. Haraftrat broyta veingirnir framdráttin, sum ger, at Teistin sparir brennievni.

Eirik Bøckmann, sum arbeiðir hjá Wavefoil, sigur, at Teistin sparir umleið 10 prosent av brennievni við nýggju veingjunum. Samstundis heldur skiparin á Teistanum, Jónleif Láberg, at skipið er vorðið róligari, og tað rullar minni nú.